Foreldrar og nánasta fjölskylda eru lykilmanneskjur þegar kemur að velferð og vellíðan barna en börn við misjafnar aðstæður og því er mikilvægt að hafa alltaf í huga að við þurfum að láta okkur velferð allra barna varða.
Christoper Peterson var einn af upphafsmönnum jákvæðrar sálfræði og hans nálgun á fræðin hafa haft mikil áhrif á þá hugmyndafræði sem ég starfa eftir í vinnu með börn og samskipti þeirra. Hann taldi að draga mætti kjarna jákvæðrar sálfræði saman í þrjú orð: “Other people matter” og bætti við: “We all are other people”.
Jákvæð tengsl eru gagnvæm og ná bæði yfir okkar upplifun af samskiptunum og einnig yfir það hvernig börnin upplifa okkur. Við getum haft áhrif á tilfinningar barnsins því tilfinningar eiga það til að yfirfærast yfir á að aðra, bæði góðar og slæmar. Þegar börn er í uppnámi fer varnarkerfi þeirra í gang ,hugsun og hegðun verður sjálfhverf og hæfni til að hjálpa öðrum og eiga góð samskipti minnkar.
Með því að anda inn og út, náum við inn í sefkerfi líkamans sem er rólegi hluti taugakerfisins. Þegar við náum að virkja sefkerfið og náum stjórn á viðbrögðum okkar hefur það róandi áhrif á barnið. Í sefkerfinu verðum við hæfari til að mynda jákvæð tengsl og yfirfæra góðar tilfinningar í samskiptum við barnið.
Hugmyndafræði Peterson byggir á fimm þáttum sem hjálplegt er að hafa að leiðarljósi í samskiptum við börn og hefur jákvæð áhrif á öryggi og samskiptahæfni barna sem styrkir sjálfsmynd þeirra og eflir sjálfstraustið.
- Vertu til staðar og veittu óskipta athygli. Hlustaðu án þess að máta þig við aðstæður barnsins – leggðu þig fram við að skilja upplifun þess og sjónarhorn
- Hafðu í huga að allt sem þú segir og gerir hefur áhrif. Vertu uppbyggjandi og forðastu að setja út á barnið og kvarta. Hafðu í huga að þú getur haft jákvæð áhrif á sjálfsmynd þess
- Taktu eftir og leggðu þig fram við að sjá og meta styrkleika og það góða í barninu. Veittu því góða rými til að vaxa
- Vertu hvetjandi og styðjandi þegar barn ströglar og missir trúna á sjálft sig. Stuðningur og hvatning getur skipt sköpum
- Taktu þátt í sigrum barnsins, láttu það finna að þú metir mikils það sem það leggur á sig og láttu þig velgengni þess varða – það er styrkur að læra að samgleðjast öðrum