Styrkleikakort - Veitum styrkleikum athygli

VIA styrkleikarnir samanstanda af tuttugu og fjórum mannkostum sem við búum öll yfir. Misjafnt er hverjir styrkleikanna eru okkur tamastir en um það bil fimm þeirra verða mest ríkjandi í fari okkar. Þá styrkleika upplifum við sem hluta af sjálfsmynd okkar og kjarnann í því hver við erum. Við njótum okkar best í aðstæðum sem reyna á þessa kjarnastyrkleika.

Á kortunum eru lýsingar á styrkleikunum. Þau hjálpa okkur að átta okkur á hvað í okkur býr og að sjá það góða í öðrum líka. Þau nýtast til dæmis sem verkfæri til að styrkja sjálfsmynd einstaklinga, virkja áhugahvöt og byggja upp styrkleikamiðað andrúmsloft og samkennd í hópum.

Stærri kortin: ítarlegri og dýpri lýsing á hverjum styrkleika fyrir þá sem vilja öðlast betri skilning og kafa aðeins nánar í eiginleika hans. 

Minni kortin: örstutt, skýr og hnitmiðuð lýsing á því helsta sem einkennir hvern styrkleika. Þau henta sérstaklega vel fyrir börn og þá sem vilja auðlesna yfirsýn.

Bókin Jákvæð sjálfsmynd – VIA styrkleikar er leiðbeiningabók sem nýtist með kortunum. Þar er farið dýpra í hvern styrkleika með ítarlegri lýsingum og dæmum um hvernig hægt er að tengjast þeim og virkja í daglegu lífi. Í bókinni eru einnig hugmyndir að vinnu með kortin.